O Clube presenta, na Torre de Meira, oficialmente o equipo que defenderá as nosas cores na tempada 2025 da LGT. Un acto emotivo e cargado de simbolismo que reuniu a autoridades, socios e socias, afeccionadas e afeccionados e a savia nova das nosas categorías base,  demostrando unha vez máis a unión e paixón que se vive polo remo en Meira.

Un equipo con selo propio: corazón de Meira

A base do proxecto para a LGT 2025 é clara: apostar pola xente da casa. Dos 21 integrantes do equipo, a inmensa maioría son remeiros que creceron e se formaron nas nosas propias categorías inferiores. Unha filosofía que busca consolidar un proxecto a longo prazo e que reforza o sentido de pertenza.

Mantéñense nove remeiros da tempada anterior, achegando esa experiencia e coñecemento vital para a competición. A eles súmanse varios canteiráns recuperadas que volven vestir a nosa elástica, unha excelente noticia que demostra o atractivo do noso club. As cinco incorporacións de fóra chegan para sumar talento e complementar un equipo onde máis da metade dos remeiros teñen menos de 30 anos, garantindo unha enerxía e un futuro prometedor. Ademais, este proxecto vese reforzado coa chegada do noso novo adestrador, que aterra coa misión de potenciar o talento local e levar ao equipo ao máis alto.

A canteira: o futuro asegurado

Un aplauso especial dedicouse ás nosas categorías base, presentes no acto. Ver aos nosos mozos e mozas remeiros e remeiras aquí hoxe, coa ilusión nos seus ollos, é o mellor sinal de que o futuro do noso club está en boas mans. Eles e elas son a canteira, a savia nova, e o seu esforzo e dedicación son o espello no que se miran os maiores, garantindo a continuidade da tradición remeira en Meira.

Un recoñecemento a unha lenda: José Luis Macey

O momento máis emotivo da mañán chegou co recoñecemento a unha figura icónica do noso club: José Luis Macey. Dende 1993, Macey remou no noso primeiro equipo, consolidándose como o terceiro remeiro máis lonxevo nun só club a nivel estatal. Os seus números son impresionantes: máis de 77 vitorias en regatas da LGT e a friolera de catro Ligas LGT no seu palmarés. Pero máis alá dos títulos, Macey é un símbolo de entrega, compromiso e amor inquebrantable polas nosas cores.

Co equipo xa presentado e o corazón cheo de esperanza, a SD Samertolameu mira con optimismo cara á tempada 2025. O camiño non será doado, pero co apoio da nosa afección e o compromiso deste equipo, loitaremos ata a última palada.

Que empece a LGT! Forza Meira